Hölpt de „Wi snackt Platt“-Schiller, dat mehr Platt bruukt warrt?
An heel vele Steden in Plattdüütschland hangt se middewiel - in Ladens, bi'n Bäcker oder bi'n Dokter, in't Raathuus oder op't Amt un ok bi Privatlüüd an't Huus: Uns „Wi snackt Platt“-Schiller. Dor kann een mit wiesen: Hier kann een Platt! So kümmt de Spraak wedder mehr in den Vörgrund un de Lüüd warrt anröögt ehr ok to snacken.
Nu wüllt wi geern weten: Hebbt Se al en Schild bi sik hangen? Woans reageert de Lüüd dorop? Hölpt de Schiller, dat mehr Platt snackt warrt? Wi freit uns, wenn Se bi uns lütte Ümfraag mitmaakt: Ümfraag Schiller
Dat Intress an de Schiller weer hooch, na dree Maand weren all de Schiller verdeelt. Nu hebbt wi nadruckt un een kann de Schiller wedder bi uns bestellen. Kösten doot de nix. Eenfack en E-Mail an info@niederdeutschsekretariat.de schicken un seggen, wat för en Schild een hebben will. Se köönt ok mehr Schiller ordern un de an anner Steden verdelen. Weest so goot un seggt Se in düssen Fall, an wat för anner Personen un Steden dat gahn schall.
Hier sammelt wi en poor Biller, woneem de Schiller hangen doot. Wi freit uns, wenn Se uns ok en Bild tostüert! (an info[at]niederdeutschsekretariat.de)
