„Ji bruukt nich glieks den groten Plaan – söökt jo en poor Lüüd un fangt eenfach an!“
Goot 20 Intresseerten hebbt an’n 23. Oktober an de FUNKLOCK STOPPEN-Veranstalten „Spraakplanen bi de Sorben“ deelnahmen un to weten kregen, woans een de Tokumst vun en Spraak planen kann. De Referent Měto Nowak ut dat Brannenborgsche Kultusministerium in Potsdam, hett rutstellt, woso dat nich langt, en Regional- oder Minnerheitenspraak so as Plattdüütsch oder Sorbisch blots to hegen un to plegen. Dat mutt üm den Utbo vun en Spraak gahn. Un dor bruukt dat en Spraakplaan för.
Bi de Sorben löppt de Spraakplanen al siet vele Johren. Dor gifft dat Saken, de heel goot lopen doot, so as de Korpusplanen dör de Spraakkommischoon, un anner Saken. Welke vun de sünd allerbest anlopen, man anner denn ok gau wedder inslapen. Ut düsse Bispelen köönt wi lehren. In de Plicht süht Měto Nowak toeerst de Sprekergrupp – de Minschen, de de Spraak Dag för Dag bruken doot, mööt seggen, woneem dat mit jümehr Spraak hengahn schall. Wokeen bi wat för Punkten ok verantwoortlich tekent, dat mag na de Oort vun den Punkt afhangen, dat kann de Sprekergrupp sülvst, oder de Bund, de Länner, de Kommunen, oder de Weertschop ween. För en Spraak as Plattdüütsch, de vele Minschen in en groot Rebeet snacken doot, kann dat nich den een groten Plaan geven. De Spraaksubstanz is to verscheden. En Maal, dat för Sleswig-Holsteen goot to schaffen weer, kann för Brannenborg so wiet weg ween, dat dat nix hölpen wörr, in beide Länner datsülvige dörtobringen.
Měto Nowak hett de Deelnehmers Moot maakt, sik mehr mit dat Thema Spraakplanen to befaten, anner Akteuren to finnen, mit de een sik doröver uttuuschen kann. De Kampagne FUNKLOCK STOPPEN wörr dor folgens Měto Nowak goot för dögen – en Kampagne, de Parzipatschoon mööglich maakt. De Veranstalten hett wiest, wat för ünnerscheedliche Minschen tohoopkamen sünd, de sik för Spraakplanen intresseren doot. Wichtig weer dat ok, dat Thema binnen de Sprekergrupp un in de Sellschop präsenter to maken. Dat dörv keen lütte Klüngel ween, de achter verslaten Dören utklamüüstert, woans de Tokumst för Plattdüütsch utsehn kunn. Jeedeen schall de Schangs hebben mittodoon.
„Fangt lütt an. Haalt de jungen Lüüd mit in’t Boot. Kiekt jo eerstmal een Region an. Leggt realistische Malen fast, de een in korte Tiet beschicken kann. Man fangt an!“ Měto Nowak sien kloren Wöör hebbt de Deelnehmers Wind vun achtern geven. Laat uns losleggen!
Nalesen: Měto Nowak, Spraakplanen bi de Sorben (pdf)
