Na de Optaktveranstalten to dat Thema Spraakplaan Nedderdüütsch 2050 in Hamborg hebbt sik en Reeg Intresseerten funnen, de Lust hebbt, sik introbringen, wenn dat dorüm geiht, en Spraakplaan för de Regionalspraak optostellen. 16 Lüüd ut düsse Warkkoppel, sünd dat eerste Mal an’n 10. September online tohoopkamen. Dat Teel is, dat sik Minschen, de sik op verscheden Oort un Wies mit Nedderdüütsch to doon hebbt, in düssen Rahmen eerste Ansätz utarbeidt, woans een de Opgaav „Spraakplaan Nedderdüütsch 2050“ konkret angahn kunn.
To’n Instieg schull jeedeen sien gröttsten Wunsch för Plattdüütsch in een Satz formuleren. Hier sünd en poor Bispelen:
2050 …
- höört Platt to’n Alldag dorto, eendoont wat een mit de Spraak opwussen is, oder nich.
- is Plattdüütsch Verkehrs- un Familienspraak un de Kinner warrt mit Platt groot.
- is dat Dörsnittsöller vun de Plattdüütschen in Sassen-Anhoolt düütlich sieder as nu.
- is Platt in all acht Länner as Schoolfack implementeert.
- gifft dat in’t hele Spraakrebeet en systemaatsche Spraakutbillen för utwussen Lüüd.
- hebbt wi een Schriftwies un keen Arger mehr, wat för en Platt dat richtige is.
- kann ik mi över Region und Welt op Platt informeren.
Měto Nowak vun’t Soorbsche Institut, de ok bi de Warkkoppel mitmaken deit, hett dorna nochmal en Instieg to dat Thema Spraakplaan geven. An ünnerscheedlich Bispelen verkloor he, woans Telen un Maatregeln för’t Spraakplanen formuleert warrn köönt. Denn stell he verscheden Ansätz vör, woans een bi en Spraakplaan vörgahn kann: Maakt een en groten Plaan för allens, dat heet för all Domänen un verscheden Aktören? Oder is dat villicht sinniger, enkelte dezentrale Plaans optostellen?
Över düsse Ansätz hebbt de Deelnehmers vun de Warkkoppel sik uttuuscht. Dorbi is düütlich worrn, dat en grote Plaan komplex un veelschichtig is un beter för lüttere Gemeenschoppen dögen deit. Man dat plattdüütsche Spraakrebeet is groot un de Situatschoon vun de Spraak teemlich verscheden. Passlich för Platt weer dat woll, gemeensame Malen un Kriterien fasttoleggen, man denn enkelte Plaans uttoarbeiden, de in de Hand vun verscheden Aktören liggen doot. Dat bruukt Mööglichkeiten, dat sik de Lüüd inbringen un free hanneln köönt. Villicht lett sik sowat as en „Bokasten“ torechtmaken, de Warktüüch för enkelte Projekten anbüdd. In de Diskuschoon is ok düütlich worrn, dat de Weg hen na en passlich Vörgahn för Plattdüütsch noch wiet is. Wichtig is, de Sprekergrupp mittonehmen un över dat Thema optokloren. Vörslaan warrt, mit enkelte Modellprojekten antofangen. De Warkkoppel warrt sik dorto Gedanken maken.
An’t Enn vun’t Johr schall dat denn en Online-Sitten geven, woneem de Warkkoppel ehr Vörslääg un Ideen vörstellen warrt un jeedeen sik inbringen kann.
