En Informatschoonsbroschüür för jeedeen, de sien Platt utboen will
Du büst plattdüütsch opwussen, bruukst de Spraak geern mit dien Familje un Frünnen, man af un an fehlt di doch dat een oder anner Woort op Platt, wenn du över dien Arbeit oder oder Politik snackst? Oder du lehrst jüst Platt, man finnst faken keen passliche Översetten in’t Wöörbook? Dat is heel normal: Plattdüütsch is nich so utboot as Düütsch oder Engelsch. De Wetenschopsutwickeln geiht ahn Platt vör sik un Begrepen ut de Medizin, Physik, Justiz, Verwalten etc., de warrt nich op Platt översett un münt. För den enkelten Spreker, de enkelte Sprekersche föhrt dat dorto, dat een sik jümmers wedder bi düütsche Wöör bedenen mütt, üm wat vun de hüdige Tiet uttodrücken.
In de ne’e Broschüür „Mehr Wöör för Platt – Woans geiht Spraakutbo?“, rutgeven vun’t Nedderdüütschsekretariat, stellt wi vör, woans een den Spraakutbo angahn kann. Wi verkloort, woso de Utbo för Platt nödig deit, wat de Ünnerscheed twüschen Spraakwannel un Spraakatrophie is, wat för verscheden Methoden dat gifft, üm ne’e Begrepen op Platt to finnen, de bet nu fehlt. Un en poor ne’e Wöör kann en in de Broschüür ok opdecken, so as „Duersamkeit“, „Hüerdeckel“ oder „Weltruumgruus“.
Wokeen mehr to dat Thema Spraakutbo för Platt to weten kriegen will, de kann geern in den Stremel 14 vun uns Podcast klookluustert rinhören: „Spraakutbo Nedderdüütsch – woans geiht een sowat an?“
De Broschüür as Druckfaten ordern oder as PDF dalladen
Dat lütte Informatschoonsheft kann een digital kriegen, eenfack över düssen Lenk dalladen: Mehr Wöör för Platt.
Oder een kann dat Heft as Druckfaten bi’t Nedderdüütschsekretariat ordern. Kösten deit dat nix. Schrievt uns dorto en Nettbreef an info@niederdeutschsekretariat.de. Vergeet nich uns mittodelen, woveel Broschüren ji bruukt. Ji köönt ok geern mehr Broschüren kriegen un de wiederverdelen, so as bi Veranstaltens, för Uni-Seminaren, Schoolklassen, VHS-Kursen, Platt-Krings …
Klick op dat Bild un laad di de Broschüür dal!
En Trüchmellen to dat Thema Spraakutbo geven
Wi wüllt mit de Informatschoonsbroschüür en lütten Bidrag dorto leisten, dat Thema Spraakutbo in de Welt to dregen. Uns schull intresseren, woans ji dat beleevt: Gifft dat Wöör, de op Platt fehlt? Hebbt ji al ne’e Wöör in jo Platt opnahmen? Un wo seht ji noch Rutföddern för de Spraak?
Wi freit uns över en kotte Trüchmellen!
Stütt geven för de Broschüür hett dat Bunnsministerium vun’t Binnere un för Heimat.
