Tauversicht is as dat schöönste plattdüütsche Woort vun‘t Johr 2024, utsöcht vun‘n Heimatverband Mäkelborg-Vörpommern, un as aktuellen plattdüütschen Utdruck dat Woort düstersinnig*. Schient mi bald so, as wenn düsse beiden Wöör in uns Tiet passt. Wi bruukt Tauversicht. Tauversicht, dat dat na vörn geiht, dat Saken, de nich up Steed sünd, sik verännert. Anners kann een drock düstersinnig warrn. De Lüüd lengt na en Mit‘nanner in Freden. Se hööpt op beter Tieden, möögt sik nich tofreden geven blots mit gode Wöör. Se wünscht sik, dat anpackt warrt. Dat kümmt övereen mit dat Geföhl vun veel Lüüd, wenn se an Krieg un polietschen Unfreden in düsse Tieden denkt. Dat mag sacht en Enn hebben, wünscht se. Mi freit dat dorüm, dat Tauversicht dat Woort vun‘t Johr 2024 worrn is. Nix bruukt uns Welt up Steed nödiger.
Mi kümmt dorto en Vers ut en Adventsleed vun den Paster un Schriever Cord Denker ut Bartheil (Bargteheide) in‘n Sinn: „En Licht steiht op üm Minschen Moot to bringen: Wiehnacht kümmt, wat düüster is, warrt hell. De goden Wöör, se fangt nu an to klingen, un duert nich lang – is Toversicht to Stell.“
Un dat wünsch ik uns all, dat wi all mit‘nanner mit Toversicht för uns egen Wünsch un Lengen op Wiehnacht op dat ne‘e Johr togaht, man ok för uns Arbeit för de Tokumst vun uns plattdüütsche Spraak.
Heinrich Siefer,
Spreker vun’n Bunnsraat för Nedderdüütsch
