Buld 600000 Lüüe lustert to, wenn ´t up NDR 1 Neddersassen lutt: Dat kannst mi glöven! Platt satt un in verscheeden Klöören giff dat van ´n 23.03.2019 of an in ´t heile Ollenborger Land to lustern of ton Mitmaoken bi´t PlattArt-Festival 2019. Dor giff ´t dann bit to´n 30.03.2019 een heel Büld Veranstalten in Ollnborg un rundümto: Konzerte, Theater, Lesungen, Poetry-Slam up Platt, un dat uk över de Grenz weg na de Nederlande mit een Musikaltheater „De Grup“ (De Grenze) mit de Folkmusiker Otto Groote (Düütschland) un Bert Hadders (Nederland). Dat Motto van PlattART dit Johr lutt: Wi sünd so free! Infos, dat Programm un Anmelln to Veranstalten sünd unner www.plattart.de to finnen.
Siet Anfang van ´t Johr Tied löpp in väle Schoolen de Plattdüütsche Lääswettstriet. An de 5000 Kinner maakt dor bi mit – un dat mit veel Pleseeer. In veel Dörpen wedd in Neddersassen up Stäe plattdüütsch Theater spält, – aaltied is de Saal vull. Un dat uk, wenn een Heimatverein to ´n plattdüütschen Kaminabend inladen deit. Platt is lebennig, uk bi de jungen Lüüe. Bi den plattdüütschen Musikwettstriet Plattsounds in Neddersassen hebbt weer een Büld junge Musikers mitmaakt.
An de Universität in Ollenborg wedd et bold mögelk wesen, Platt as Unnerichtsfack för de Schaule to studeeiern. De Lannesregeern giff dor Stütt un Stöhn. Ja, Platt löppt. Is vandaage mehr as Folklore. Is cool, een besünner Kennteiken för Neddersassen, för Norddüütschland. Platt is Heimat. Maak mit! Proot, snack, of küüer Platt!
Heinrich Siefer
