In de verläden Maand hett de Heimatverband Mäkelborg-Vörpommern e.V. söss lütte Videos œwer de Heimatschatzkist dreicht.
Dor stellt de Leiterin von dat Projekt Johanna Bojarra mit Projektpartners 'n poor Heimatschätz vör, tau'n Bispill plattdüütsche Materialien ut de Heimatschatzkist mit Susanne Schlettwein-Kämpfer. Sei is Lihrerin an dat „Regionale Berufliche Bildungszentrum des Landkreises Rostock“ in Güstrow. Dor lihren de Schäulers, de eins Erzieher orrer Erzieherin warden willen, Plattdüütsch un woans ein dat Kinner verkloren kann.
Woans dat utsüht, kœnen Sei sik hier ankieken:
Dat Projekt Heimatschatzkist is ein Deil von dat Landesprogramm „Mine Heimat - Min modernes Mäkelborg-Vörpommern“. Dat ward siet 2016 von denn Heimatverband M-V ümsett un von dat Bildungs- un Sozialministerium von't Land finanziert. 2019 hebben all Kitas und Horte in M-V 'ne Heimatschatzkist krägen. Nu kœnen de Erzieher un Erzieherinnen in't Land bi Fuurtbillungen œwer Themen ut de Heimatschatzkist mitmaken.
Doch ok hier hett de Corona-Pandemie kein Halt makt. Väle Fuurtbillungen sünd utfollen. Dorüm hett sik de Heimatverband 'ne digitale Alternative œwerlecht.
Mihr œwer dat Projekt un de fief anner Heimatschatzkist-Filme finnen Sei up de Internetsiet un in denn YouTube-Kanal von denn Heimatverband M-V.
Text: Johanna Bojarra
Foto: Heimatverband Mecklenburg-Vorpommern e.V./Juni Media
