Snackst du vun Huus ut Platt? 
Ja, dat heff ik as Kind al daan, ik heff domals bi’n plattdüütschen Leeswettbewerb mitmaaakt un mien Omas un Opas hebben beid‘ jümmers mit mi Plattdüütsch snackt. Un so heff ik dat mitkregen as lüttjen Keerl. Un ik heff ok plattdüütsch Theater speelt. Bi uns up’t Land snacken noch vele Lüüd Plattdüütsch, un ok de Ollen vör allem.
Woso maakt ji plattdüütsche Musik?
Dorto bün ik kamen, as de Börgermeister von de Gemeen Apen mi ‘n Breef toschickt hett, un dor hett he seggt: "Minsch, Jens, du maakst ja Punkrock, un dor gifft dat düssen Band-Wettstriet: Plattsounds. Hest du nich Lust, ok mal ‘n plattdüütschet Leed to maken?" Dor heff ik en Text schreven: Punk op Platt, un heff denn to de Jungs seggt: "Minsch, laat uns dat doch man versöken", un dor hebbt se seggt: "Minsch, dat is ja en lustige Idee, dat versöökt wi eenfach mal." Un dat hett so goot funktioneert, dat wi seggt hebben, denn maakt wi eenfach noch ‘n poor mehr Leders un hebbt bi den Wettstriet ok mitmaakt un den 2. Platz maakt, un dat hett uns so Spaaß maakt, dat wi seggt hebben: "Dat maakt wi wieter!"
Passt Punkrock un Platt överhaupt tohoop?
Dat höört man ja, dat dat goot tosamen passt. Wi hebben uns ok vörher Gedanken maakt dorto, aver de plattdüütsche Spraak is ja ok so’n bittje – wo schall ik dat seggen – ‘n bittje butt. Un dat passt ganz goot to düsse Musik, de is ja ok mitünner ‘n bittje härter un Plattdüütsch is eenfach so’n moie Spraak, dor kann man Moorslock seggen, un dat klingt nich so stur as up Hoochdüütsch.
Woans kümmt jo Musik bi de Lüüd an?
In de Anfangstiet harrn wi dat ‘n bittje sturer, de Lüüd, de Punk-Rock goot finnen, de finnen Plattdüütsch nich so goot. Un de Lüüd, de Plattdüütsch goot finnen, de finnen Punk-Rock nich so goot. Un na so fief Johr hett sik dat denn so inpegelt, dat dor nu de Snittmenge is, dor sitt nich ganz so vele Lüüd, man de sünd treu un de höört de Musik ok geern.
Wenn een an plattdüütsche Musik denken deit, denn kümmt een nich foorts op Punk-Rock. Wat is för jo de Ünnerscheed twüschen de ne’e plattdüütsche Musik un de traditionelle?
De Ünnerscheed twüschen ne‘e plattdüütsche Musik un traditionelle plattdüütsche Musik – ik will dor nu nich irgendwat slecht maken, aver de klassische plattdüütsche Musik, dat is eher so Shantys oder ok mal Singer-Songwriter-Saken – dat ik moi, mag ik ok geern hören. Aver ik finn dat ok bannig intressant, wenn denn nu ‘n bittje Hip-Hop dorbi kümmt oder bi us ‘n bittje Punk-Rock oder ‘n bittje Metal. Dat man düsse Spraak in en ne‘et Gewand höört un villicht ok attraktiver maakt för Lüüd, de normalerwies mit de Spraak nix an’n Hoot hebben.
Bringt Musik-Wettstriets wat för junge Bands?
De plattdüütsche Bandwettbewerb Plattsounds, de bringt heel goot wat för de Bands un de plattdüütsche Spraak. Dat hett man ja ok an us sehn, man ok bi anneren, bi Bloom un Matin to’n Bispeel, de plattdüütschen Hip-Hop maakt, manche Lüüd, de kaamt denn so up denn Geschmack, so as wi, un de maakt dat denn ok wieter. Un sülvst, wenn de Lüüd denn blots een plattdüütsch Leed maakt, is dat ok eenfach so, dat de sik mal mit de Spraak utenanner sett hebben. Un vun dorher is de plattdüütsche Plattsounds-Wettbewerb en heel wichtige Saak för de plattdüütsche Spraak un de schall man ok blots wieter gahn.
