De Bundesraat för Nedderdüütsch (BfN) un dat Nedderdüütschsekretariat (NdS) weern an’n 18. März dat eerste Mal as Gast bi den Parlamentskreis Plattdüütsch dorbi. Inlaadt harr Gyde Jensen, Afornte vun de FDP in’n Düütschen Bunnsdag. Se hett tohoop mit Johann Saathoff, Afornte vun de SPD un parlamentaarsche Staatssekretär in’t Binnenministerium den Parlamentskreis Plattdüütsch in Gang bröcht. To den Parlamentskreis höört Afornten ut de verscheden Parteien to, de sik för Platt intresseert un de sik för de Spraak insetten wüllt.
De beiden Sprekers vun den BfN, Saskia Luther un Heinrich Siefers un Christiane Ehlers vun’t NdS hebbt mit de Afornten över ehr spraakpolitisch Arbeit snackt un jüm inlaadt, de Wannerutstellen „Was heißt hier Minderheit?“ in’t Paul-Löbe-Huus antokieken. Bi den Uttuusch güng dat vör allen üm dat Thema Jugendarbeit. Bi de Online-Warksteed „Junge Lüüd för Plattdüütsch“ in’n Snack mit Gyde Jensen weer de Idee to den Parlamentskreis wedder vördag kamen. De Afornten hebbt Stütt för de Jugendarbeit toseggt un över en Drapen mit junge Lüüd ut de Sprekergrupp in Berlin nadacht.
Gyde Jensen hett bi dat Drapen ok de Bedüden vun Plattdüütsch in de Pleeg op’n Disch bröcht – en Thema, för dat de BfN sik siet vele Johren insetten deit. Heinrich Siefer hett vun dat Erinnerungsbook „Weetst du noch?“, de Wittstocker Erklärung un dat PlattHart Siegel vertellt. De Vörslag vun Gyde Jensen, bi een vun de neegsten Drapen vun den Parlamentskreis Lüüd intoladen, de sik op dat Feld insetten doot, keem bi all Deelnehmers goot an.
De BfN un dat NdS seggt hartlichen Dank för de Inladen un den Uttuusch mit de Afornten!
