An’n Sünnavend, 30. April hett de nedderdüütsche Sprekergrupp in Sleswig-Holsteen en niegen Plattdüütschen Raat kregen. Bi en Wahlveranstalten in Rendsborg hebbt Lüüd ut dat ganze Land in en geheeme Wahl söven vun ölven Kandidatinnen un Kandidaten ehr Stimm geven.
In den Raat sitt nu vun 2022-2026:
- Bindzus, Ingrid – Lauenburg
- Ehlers, Marianne – Welt
- Fries, Christel – Eckernförde
- Graf, Jan – Passade
- Jensen, Klaus – Pellworm
- Söhren, Dirk – Kiel
- Voß, Kirsten Maria – Kiel
Siet dat Johr 2000 gifft dat in Sleswig-Holsteen den Plattdüütschen Raat. He snackt för de nedderdüütsche Sprekergrupp in uns Land. De Raat sett sik in för: Plattdüütsch in Familien – för de Lütten – in School un Uni – in de Pleeg – in de Medien – in de Kark – in de Verwalten etc.
Na 22 Johr sprakenpolitsche Arbeit in Sleswig-Holsteen schall dat nu wieder gahn mit de Arbeit för de Spraak, de niege Raat hett sik veel vörnahmen. Dat Thema Billen is wiederhen wichtig, man ganz groot op den Zeddel steiht „Nedderdüütsch in de Medien“ mit de Kampagne „Funklock stoppen!“
De Beopdragte för Minnerheiten un Nedderdüütsch vun den Ministerpräsidenten, Johannes Callsen, snack sienen Dank för dat grote Engagement vun den Raat ut. „De Plattdüütsche Raat hett siet mehr as 20 Johr en grote Bedüden un is ut dat Platt-Nettwark in uns Land nich mehr wegtodenken!", so Callsen in Rendsborg. „Blots tosamen köönt wi dat henkriegen, för de Spraak in all Rebeten to arbeiden.“
SHHB-Präsident Peter Stoltenberg maak düütlich, dat de SHHB ok wiederhen den Plattdüütschen Raat stütten warrt. „De Sleswig-Holsteensche Heimatbund weer vun Anfang an dorbi – bet vundaag liggt de Geschäften vun den Raat in de Hand vun’n SHHB. Nu köönt wi – na mehr as twee Johrteihnten – en positive Bilanz trecken: Nich blots de Arbeit för den Raat, ok de Arbeit för de plattdüütsche Spraak in’n Ganzen speelt in uns Huus en ganz wichtige Rull. Dorto kümmt, dat de SHHB nu siet fief Johr ok för den Bundesraat för Nedderdüütsch dor is: Wi kriegt dat Geld vun den Bund in Berlin, dormit de BfN mit dat Nedderdüütschsekretariat sien Arbeit maken kann. So sünd wi nich blots för Platt in uns Land dor“.
Bi de eerste Sitten warrt de niege Plattdüütsche Raat twee Delegeerten för den Bundesraat för Nedderdüütsch bestimmen un ok fastleggen, wokeen för den Raat na buten hen snacken warrt.
Foto (v.l.n.r.) Peter Stoltenberg (SHHB), Ingrid Bindzus, Klaus Jensen, Jan Graf, Christel Fries, Dirk Söhren, Marianne Ehlers, Kirsten Maria Voß, Johannes Callsen (Minnerheitenbeopdragde)
