De Emsländische Landschaft richt vun’n 7.-16. Oktober wedder dat plattdüütsche Festival PlattSatt! in’t Emsland un in de Grafschaft Bentheim ut.
Punk un Pop, Kabarett un Comedy, Musik un mehr… dat allens op un mit us Regionalspraak! Dat PlattSatt-Festival wiest, dat een us Spraak ok för heel modern Saken bruken kann. Man kann op Platt över allens proten, snacken oder kören. Op de Bühn un dorvör. Well keen Platt kann, hett aver ok keen Problem, denn verstahn könnt dat jümmers noch de allermesten Lüü in us Region!
Wi wüllt düchtig Dank seggen an de regionalen Akteure, Künstler un Künstlerschkes, de mitmaken bi us Festival! Ahn jo kunnt wi dat gor nich op Patt bringen. Tosomen wiest wi, wo bunt un veelföltig us Region un Spraak sünd, denn dat gifft ja nich blots een Platt, dat gifft vele Dialekte mit egen Besünnerheden. Man blots tosomen könnt wi dat henkriegen Platt lebennig to holln!
Veel Plesär bi dat PlattSatt-Festival, en grote Fier für us Spraak.
De Emsländische Landschaft
Dat Programm is bunt un maakt Lust op Platt: De plattdüütsche Klappmuulpopp Werner Momsen maakt den Opslag vun dat dat Festival, denn warrt Norma, Gerrit Hoss, de Deichgranaten un de Schkandolmokers Musik maken, dat gifft Impro-Theater, en Vertellcafé un en NABU-Vagelwannern op Platt, de Podcast PLATTCAST warrt live optekent un ok en Büttenwarder Namiddag is mit dorbi. För all, de nich in’t Emsland wahnt: Dat is en Reis weert!
Hier köönt ji dat Programm daalladen.
