An’n 22. September is dat sowiet: De Verfilmen vun Dörte Hansen ehren Romaan „Mittagsstunde“ löppt in’t Kino an. Charly Hübner speelt den 47-jöhrigen Ingwer Feddersen, de trüch na Brinkebüll kümmt, dat lütt Dörp in Noordfreesland woneem he opwussen is. He kümmert sik dor üm sien Öllern – üm sien dickköppschen Vadder un sien demente Moder. Sien Dörp vun fröher kennt he nich wedder un he mutt sik mit verscheden Themen uteneen setten – Familie, Besinnen an de Kinnertiet, Heimat, Strukturwannel, Verännern vun’t Dörpsleven, man ok mit Olenpleeg un Demenz. Dörte Hansen, de sülvst ut en lütt Dörp in Noordfreesland kamen deit, vertellt woans dat aflopen is, as ut ehren Romaan en Kinofilm worrn is, wat för en Rull Plattdüütsch dorbi speelt hett un woans de Schauspelers mit de Spraak kloorkamen sünd: „Dörte Hansen: Roman „Mittagsstunde“ kommt in die Kinos“ (NDR, Bidrag vun Lornz Lorenzen).
Den Film gifft dat in twee Faten: een hoochdüütsche un een mit plattdüütsche Dialogen (un Ünnertitel). Elk Kino kriggt beide Faten un kann sik utsöken, welk wiest warrt. Villicht gifft dat bi jo in’t Kino ja de plattdüütsche to sehn? Wenn nich, schrievt dat Kino an un fraagt na!
Op de Siet https://www.mittagsstunde-film.de/netzwerk gifft dat en Barg an Materiaal to den Film, ok to’t Thema Plattdüütsch.
