Büst al in Rostock ween? Wenn nich, denn vertell ik Di, wat een sik dor ankieken kunn. In de Midd vun de Stadt, ok in de Midd vun de Straat tau’n Inköpen, dor steiht groot un staatsch achter ‘n Wisch mit ‘n poor Bööm de Hauptbu vun de Universität. Den gifft dat nu al över 600 Johr in de olle Hansestadt – un een kunn dor ok Tante Meier besäuken gahn, ahn Geld tau betahlen, wenn een grad in de Neeg is! Wat is dor noch allens bi? De olle Muer, de de Stadt in dat Middelöller schütt hett un ‘n poor olle Doren vun de Stadt, vääl Möglichkeiden, wat tau äten un intauköpen, t. B. gifft dat in de Breite Straat ‘n Koophall mit ‘n lütten Waterfall un ok ‘n Kino. Denn gifft dat dor noch ‘n Museum un ok twee Karken. In de een, de Marienkark bi’n Niegen Markt, dor finnt een de astronoomsche Klock binnen un kunn sik ehr ankieken. Man een mööt dor ok ‘n beten Geld för betahlen, dat een dor rinkümmt.
Wenn een noch ‘n beten wieder dör de Stadt gahn mag, denn kunn een ok noch na’n Ollen Markt hengahn, dor steiht de Petri-Kark un an’n besten geiht een denn an de olle Muer vun de Stadt längs: över den Wall un den Rosengoorn mit de ollen Linnen na dat Steendoor hen un denn wieder an de olle Muer, dör de histoorschen Straten un längs de smucken, ollen Hüser na de Nikolaikark hen. Dat is ‘n Kark ween, man hüüt is dat jüst noch ‘n Uurt för Musik orrer Films un so wat. Dor in dat Dack, dor sünd Balkons inbuut, un dor wahnen Minschen. De Straat vun achter de Nikolaikark tau de Petrikark hen is bannig smuck, man up de anner Siet vun de olle Muer vun de Stadt kunn een ok längslopen, dor is ‘n groten Platz, dor kunn een spelen un een süht ok wiet in de Fiern vun baven, wenn een denn wieder an de Muer längs geiht un kümmt ok up düssen Weg bi de Petri-Kark an.
In’n Norrn vun de Rostocker Binnenstadt liggt de Haven. Dor sünd hüüt blots noch lütte Scheep, veel Segelscheep un ‘n poor enkelte gröttere. Jüst tau de Hansesail in’n Austmaand sünd dor wedder bannig veel grotte Scheep tau seihn!
De Haven mööt een ok seihn hebben. Dor gifft dat naug wat tau eten för jeedeen Geldbüdel un een kunn dor längs an de Kaikant lopen un up de anner Siet henkieken – dor is dat gräun un dor sünd Bööm un wenn een so veel Tiet hett, denn kunn een mit de Fähr vun’n Kabutzenhoff na Gehlsdörp röver föhren un ‘n Runn an de Waterkant längsspazeren orrer mit dat Fohrrad föhren. Denn kunn een sik Rostock vun de anner Siet ankieken un is middemang in de Stadt blangen Bööm un Wischen un Water. Een kümmt denn ok wedder na de Stadt rin, wenn een wieder un wieder an de Waterkant längslopen deit!
Wat ok tau Rostock hüürt, man dat is ‘n beten wieder weg, dat is Warnemünn. De Oostsee un de Strand, de Sand, de Mool un de Füertoorn. Dor kümmt een kommodig mit de S-Bahn hen, de föhrt ok fakens un is fix dor. Vun’n Bahnhoff sünd dat jüst üm un bi 20 Minuten. Orrer een föhrt vun’n Haven ut, vun’n Schickmann, na Warnemünn mit ‘n Fähr. Man de is düer, dor betahlt een för ‘n half Stünn wat tüschen 10 un 20 Euro för een Persoon. Besünners an Warnemünn is de Teepott – ‘n Huus an’n Füertoorn, dat süht würklich bannig gediegen ut! Dor kunn een inköpen un wat Eten. Un up den Lüchtoorn kunn een na baven gahn un sik Warnemünn vun baven ankieken. Man dat maakt een beter vun dat Neptun ut. Dat is ‘n Hotel un de gröttste, wat in Warnemünn buut worrn is. Dor gifft dat baven in de 19. Etaasch ‘n Restaurant, dat maakt Klock een apen. Un dor kunn jeedeen rin un kunn bannig wiet kieken: över dat Water, de Strand, de Haven un na Rostock hen. Man dor bruukt een ok gaud Weder för! Süss kann een in Warnemünn bannig gaud flaneren un baden gahn.
Dat gifft een Kurpark un gaud eten kann een ok in de Moehlnstraat bi’n Markt un up de Siet, up de mihr Rauh is vun’n ollen Stroom. De anner Siet föhrt na’n Strand un de Mool hen, dor is bannig veel los, man dat is ok smuck dor.
Up de Brüch vun’n Bahnhoff kunn een ‘n Foto vun den Kutter maken un wokeen giern Fisch eten deit, de mööt up de Middelmool up den Fischmarkt gahn. Un wokeen jüst baden gahn mag, de föhrt villicht in’n Sommer nich direktemang na Warnemünn rin, de kunn ok al bi de Warft ut de Bahn stiegen un denn Bus na Dietrichshagen nehmen, denn föhrt een bit tau de Jöögdünnerkunft un geiht dor an’n Strand. Dor is nich so veel los as in Warnemünn sülvens. Dat is wieder buten. Vun dor kunn een ok noch dör denn Woold gahn un villicht na dat Kap Stolera hen, dat is de Eck, bit tau de een vun Warnemünn ut kieken kunn. Denn süht een vun dor ut Hilligen Damm un Käulungsborn in de neegste Bucht. Un dat gifft noch so veel, wat een noch daun kann in Rostock! An’n besten haalt een sik ‘n Ticket för denn apentlichen Personenneegverkihr. Mit dat Auto mööt een blots ‘n Platz säuken un betahlen, woneem een dat afstellen kunn! Un villicht blifft een ok nich blots een Dag dor orrer kümmt ‘n anner Mal wedder an de Stadt an de Waterkant. Dor gifft dat noch so veel tau seihn!
Schrieversche: Nadine Koop
Titelbild: Darkone, CC BY-SA 2.5, via Wikimedia Commons
