Du büst Füer un Flamm för Plattdüütsch un hest Lust, wat Nieges kennentolehren? Du wüllst frische Ideen sammeln un Minschen kennenlehren, de ok för en Saak brennt? Denn büst du jüst richtig bi dat „platt drift barcamp“ an de Nordsee-Akademie in Leck. Dat Nettwarkdrapen organiseert dat Zentrum för Nedderdüütsch in‘ Landsdeel Sleswig tosamen mit den Kulturknotenpunkt Nordwest un de Nordsee Akademie. Wokeen nu neeschierig worrn is, de schall man an‘n Sünnavend, 25. März na Leck kamen un mitmaken.
Drift is dat plattdüütsche Woort för Eifer, Leidenschaft un Tatkraft. Un dat wüllt de Lüüd hier tosamen föhlen un delen. En fastes Programm gifft dat nich, dat maakt de Lüüd, wat kamen sülven. Dat heet: Se bringt Ideen för „Session“ mit, dat sünd Anbotten to mitmaken, tohören, uttuuschen, de bet to 45 Minuten duern. Ok eenfach kamen un mitmaken, wat annern anbeden, geiht kloor. „De Dag warrt vun de Besökers maakt“, verkloort Gesa Retzlaff vun’t Plattdüütsch Zentrum, „wi schafft blots den Rahmen. Dat Leven un den Uttuusch, dat maakt all mitenanner.“ Op dat verleden platt drift barcamp 2022 geev dat en Grupp, de sik üm plattdüütsche Kinnerböker bi Instagram kümmert hett, en anner Grupp wull wat mit Platt in de Verwalten maken, dat geev wat över Bildung für nachhaltige Entwicklung kennentolehren un wat över Coaching op Platt. Wenn de Themen faststaht, kann sik jedeen wat utsöken. Un an’t Enn warrd denn präsenteert, wat de Lüüd ut de enkelten Sessions mitnahmen hebbt. Üm Klock teihn (10.00) geiht dat platt drift barcamp in Leck los, twüschendörch gifft dat Middageten un en Energie-Kick mit Lisa Wrogemann (eat.platt.love). Üm Klock veer geiht de Dag denn toenn. Mitmaken kost nix, een mutt sik blots hier anmellen. Kiek op www.platt.best
Text: Heike Thode-Scheel
