Trüchblick op de Veranstalten „Korpus, Status, Verwarf“

In’n Rahmen vun de FUNKLOCK STOPPEN!-Kampagne geev dat an’n 23.02.2023 en Veranstalten över Spraakplanen. Ünner dat Motto „Korpus, Status, Verwarf“ is op Basis vun Robert Cooper sien Spraakplanen-Framework vun Arne Lentföhr en Impulsvördrag holen worrn. Dat PDF hiervun kann een hier finnen: Arne Lentföhr – Spraakplanen in de Nutiet. Düsse Vördrag schull de deelnehmen Lüüd inladen, mitenanner to diskeren. Un dat hebbt se ok daan, en Grootdeel hett sik in en Diskuschoon achterna driftig uttuuscht un dat sünd bannig vele Themen op’t Tablett kamen, de all en goden Input geven to „Spraakplanen“. Un dat weer ok vun Belang, denn FUNKLOCK STOPPEN! is mehr as man en Kampagne för en egen Radiosenner, man ok en Ansinnen, dat de Spraak utboot warrt, wo Spraakplanen en heel wichtigen Deel vun is. Dorso weer düsse Onlineveranstalten en hele Spood un dat weer eendüdig, wo wichtig dat Thema för de Lüüd is.