Leve junge Lüüd,
siet 20 Johr maakt de Bundesraat för Nedderdüütsch (BfN) Politik för Platt un steiht in för de Plattsnackerinnen un -snackers ut Brannenborg, Bremen, Hamborg, Mäkelborg-Vörpommern, Neddersassen, Nordrhien-Westfaolen, Sassen-Anholt un Sleswig-Holsteen. Ok de Grupp vun de Plautdietschen is mit dorbi. De BfN passt op, dat de Länner jümehr Plichten, de se mit de Europääsche Sprakencharta övernahmen hebbt, ok ümsetten doot. Stütt kriggt de BfN dör dat Nedderdüütschsekretariat (NdS).
Jümmers för veer Johr schickt de acht Länner je twee Delegeerten in den Bundesraat. In’n Juni fangt de ne’e Delegatschoonsperiood för de Tiet vun 2022 bet 2026 an. En ne’e Delegatschoonstiet steiht jümmers ok för en Ümswung un en ne’en Anfang. Üm bi de sprakenpolitische Arbeit de Intressen vun de jungen Lüüd bavenan stellen to könen, wüllt wi jüm sülvst to Woort kamen laten. Wokeen kunn beter för de jungen Lüüd snacken as se sülvst? Wi muchen geern twee Beopdragden för de jungen Lüüd in den Bundesraat opnehmen.
Hest du Lust di in den Bundesraat för de Intressen vun de jungen Lüüd intosetten un büst ünner 35? Denn mell di geern bi uns! Du bruukst keen Platt snacken könen.
- Stell di kott vör. Woans büst du to Platt kamen?
- Woso muchst du di för de Spraak insetten?
- Wat sünd för di de wichtigsten Punkten, dat mehr junge Lüüd en Togang to Platt finnt?
Schriev uns bet to’n 22. Mai 2022 an Christiane Ehlers, info@niederdeutschsekretariat.de. Ok wenn du noch Fragen hest, kannst du di hier mellen.
In’n Juni kümmt de ne’e Bundesraat dat eerste Mal tohoop. Wi freut uns, wenn wi denn ok de twee Beopdragden för de jungen Lüüd begröten köönt!
