28.07.1955 – 17.11.2022
De plattdüütsche Spraak leeg em an’t Hart. Hartmut Cyriacks weer Fachmann för Platt, bi’t Översetten, Schrieven, as Spreker un in de Spraakpolitik. He weer woll sowat as en plattdüütschen „Tausendsassa“.
Op de Welt kamen un opwussen is Hartmut Cyriacks an’n 28.07.1955 in Achim in Neddersassen. In sien Heimat hett he ok sien Fro Christel Harasimowitsch kennenlehrt. För’t Studium is he na Brunswiek trocken un hett dor Düütsch un Geschicht op Lehramt studeert. Man in den Schooldeenst wull he denn doch nich gahn – sien Weg hett em na’t Theater henföhrt. Siet 1985 weer he tosamen mit sien Kolleeg Peter Nissen as Dramaturg an’t Ohnsorg-Theater.
1994 güng jümehr Tiet an’t Ohnsorg-Theater toenn un de beiden hebbt ehr Textmanufaktur in Hamborg Ottensen inricht. Meist 30 Johr lang weern se Siet un Siet as Översetters un Schrieverslüüd togang. Se hebbt en Barg Theater- un Höörspeeltexten, Romanen un Comics op Platt översett, Stücken för’t Feernsehn synchroniseert un ok sülvst Texten schreven – so as en Höörspeelreeg för junge Lüüd, plattdüütsche Spraakföhrers un Lehrböker. To hören weern Cyriacks un Nissen vele Johren as Sprekers vun de plattdüütsche Narichten bi NDR 90,3 un se hebbt den Schrievwettstriet Vertell doch mal vun’n NDR op de Been stellt.
Blangen sien Arbeit as Översetter un Autor harr de Spraakpolitik en heel groot Bedüden för Hartmut Cyriacks. Em weer dat wichtig, sik för de Spraak un ehr Tokunft intosetten. Siet 2006 seet he as een vun de beiden Delegeerten för Hamborg in den Bunnsraat för Nedderdüütsch. 16 Johr lang hett he sik mit veel Knööv op Bunnsebene för de Regionalspraak stark maakt. As de BfN 2007 mit de Schweriner Thesen formuleert hett, dat hoochnödig en Schoolfach Plattdüütsch inricht warrn mutt, hett Hamborg as dat eerste Bunnsland den Faden opnahmen. As Vertreder vun den Plattdüütschroot för Hamborg weer Hartmut Cyriacks dicht dorbi. In de verleden twee Johr weer he tosamen mit Peer-Marten Scheller Spreker vun den Plattdüütschroot. Se hebbt sik düchtig dorför insett, dat de Plattdüütschünnerricht in de Scholen wedder mehr in Gang kümmt.
An’t Hart leeg Hartmut Cyriacks ok, dat Plattdüütsch in’t Kulturleven un in de Medien en fasten Platz kriggt. Dorför hett he streden, in’n BfN un ok na buten hen – en Glattsnacker, dat weer he nich. För em güng dat jümmers üm de Saak: De Sprakencharta eernst nehmen un de Plichten ümsetten. As de Fachlüüd vun’n Europaraat düt Johr to Besöök in Hamborg weern, do hett he düütliche Wöör funnen, wat ut Sicht vun de Sprekers in Hamborg noch nich goot lopen deit.
Hartmut Cyriacks hett veel Impulsen för de Arbeit vun’n BfN geven. Dat geev meist keen Sitten, bi de he fehlen dee. Wi kunnen uns op em verlaten. Ok de Gremienarbeit op Bunnsebene weer em wichtig. Bi dat Länner-Bund-Referentendrapen un den Beraden Utschuss Nedderdüütsch weer he för de Sprekergrupp dorbi un is faken na Berlin reist. De Sitten vun’n Beraden Utschuss Nedderdüütsch an 12. September 2022 in Stapelfeld weer sien letzten Insatz för den BfN.
An’n 17.11.2022 is Hartmut Cyriacks unvermodens mit 67 Johr storven. Wi köönt dat jümmers noch nich faten un sünd trurig, dat uns Kolleeg un Fründ nich mehr bi uns is. Uns Gedanken sünd bi sien Fro Christel, bi sien Familie un sien Kolleeg Peter Nissen.
Leve Hartmut, du warrst uns all düchtig fehlen! Dien kloken Ideen, dien ehrlichen Wöör, dien Gedüer mit de Lüüd un sünnerlich dien fründliche un vergnöögte Oort. Du hest di nienich ünnerkriegen laten, hest jümmers dat Gode sehn un en lütt beten Plie weer bi di jümmers dorbi. Mit di hebbt wi nich blots en Mitstrieder för de plattdüütsche Saak verloren, ne, wohrhaftig en Minschenfründ.
Dien Lüüd vun’n Bunnsraat för Nedderdüütsch
