De twete Reeg vun klookluustert is dor – Spraakpolitik för Platt

In de twete Reeg vun klookluustert, den plattdüütschen Podcast över Wetenschop un Sellschop dreiht sik allens üm dat Thema Spraakpolitik. In jeedeen vun de fief Stremels snackt wi mit verscheden Gäst över spraakpolietsche Themen. Ji kriegt to weten, woans Spraakpolitik för Platt överhööft utsehn deit. De Bunnsraat för Nedderdüütsch as Vertreder vun de plattdüütsche Sprekerschop verkloort sien Arbeit, wat se betto beschickt hebbt un wo se op rut wüllt. Denn geiht dat üm Politik för Platt op Lännerebene un hier sünnerlich üm de Billenspolitik. Man ok üm aktuelle Themen so as Spraakplaan Nedderdüütsch 2050 un Spraakutbo Nedderdüütsch schall dat in düsse Reeg gahn. Un to'n Afsluss sett wi uns dormit uteneen, wat Spraakpolitik egens mit de enkelte Person to doon hett, wat för Rechten hett een, man ok: woans kann dat Individuum sülvst aktiv warrn un op de Politik inwarken?

Wi wünscht veel Pläseer bi't klookluustern! Ji köönt den Podcast bi Spotify, Apple Podcast oder YouTube anhören. Wenn ji Fragen un Trüchmellens hebbt, schrievt uns geern an info@niederdeutschsekretariat.de!

1. Woans löppt plattdüütsche Spraakpolitik? (op Spotify anhören | op YouTube anhören)
   Gäst: Marianne Ehlers un Heinrich Siefer vun'n Bunnsraat för Nedderdüütsch
   Moderatschoon: Christoph Ahlers
2. Plattdüütsche Spraakpolitik in de Länner (op Spotify anhören | op YouTube anhören)
   Gäst: Ute Eisenack un Heinrich Siefer vun'n Bunnsraat för Nedderdüütsch
   Moderatschoon: Benita Brunnert
3. Spraakplaan Nedderdüütsch 2050 - Wat höört dor egens to? (op Spotify anhören | op YouTube anhören)
   Gast: Jan Graf vun'n Bunnsraat för Nedderdüütsch
   Moderatschoon: Christiane Ehlers
4. Spraakutbo Nedderdüütsch – woans geiht een sowat an? (op Spotify anhören | op YouTube anhören)
   Gäst: Jan Graf vun'n Bunnsraat för Nedderdüütsch un Kevin Behrens vun't Nedderdüütschsekretariat
   Moderatschoon: Christiane Ehlers
5. Wat heet plattdüütsche Spraakpolitik för mi? (op Spotify anhören | op YouTube anhören)
   Christiane Ehlers un Kevin Behrens vun't Nedderdüütschsekretariat in'n Snack

Stütt geven för dat Projekt hett dat Bunnsministerium vun't Binnere un för Heimat.