„Funklock stoppen!“ – Sleswig-Holsteenschen Heimatbund vermisst plattdüütschen Radiosenner
Mit en Videoclip wiest de Sleswig-Holsteensche Heimatbund dor op hen, dat Europa keen plattdüütsch Radioprogramm hett. To sehn is en Radio, in dat dat welsche Programm vun`n brietschen Rundfunk, dat freesche Programm vun`n nedderländschen Rundfunk oder dat gäälsche Programm vun´n irischen Rundfunk löppt. As opletzt as een vun de „lütten Spraken“ vun Europa dat Plattdüütsche nöömt warrt, swiggt dat Radio.
„De Sami in Sweden oder de Rätoromanen in de Swiez tellt wi na Zigdusende. All hebbt se en seriöös Radioprogramm, wat ehr Dag för Dag vun morgens bet avends in ehr Spraak bedeent. Wat in´t `Handbuch der Sprachminderheiten` steiht, snackt in Düütschland 2,5 Millionen Menschen Platt. Liekers gifft dat so en Programm nich bi uns. Wi fraagt uns, worüm dat so is“, seggt Jan Graf, de bi´n Sleswig-Holsteenschen Heimatbund tostännig is för dat Nedderdüütsche.
De Film is eenunhalf Minuten lang un heet „Funklock stoppen!“. Vun nu af an is he to sehn op den Youtube-Kanaal vun´n Heimatbund. De Neddersassische Heimatbund, de Heimatverband Meckelnborg-Vörpommern, de Bundesraat för Nedderdüütsch, dat Nedderdüütschsekretariat, de Plattdüütsch Raat för Sleswig-Holsteen un de Plattdüütschroot för Hamborg ünnerstütt de Saak.
Kontakt:
Jan Graf, j.graf@heimatbund.de, 0431 / 98385-15
Quelle: Pressemitteilung des Schleswig-Holsteinischen Heimatbundes, 28.01.2021. Foto: Jan Graf
