De Medien speelt en grote Rull för dat Ansehn vun de Spraak in de Sellschop. Se sünd heel wichtig för de Plattsnackerinnen un Plattsnackers sülvst – för velen de eenzigste Schangs de Spraak to hören, man ok för Lüüd, de Platt lehren wüllt. Wat wüllt ji as junge Lüüd op Platt in de Medien geern anhören, ankieken oder lesen?
De Bundesraat för Nedderdüütsch un dat Nedderdüütschsekretariat laadt junge Lüüd bet 40 to en Online-Warksteed „Platt in de Medien“ an’n 16. Augustmaand 2022, Klock 6 in.
Jan Graf, Referent för Plattdüütsch un Freesch bi’n Sleswig-Holsteenschen Heimatbund un Christiane Ehlers vun’t Nedderdüütschsekretariat stellt de Kampagne Funklock stoppen! vör. De sett sik dorför in, dat ok de plattdüütsche Sprekergrupp en öffentlich-rechtlich Medienanbott op Platt kriegen deit, dat Dag för Dag sennt warrt. Bi anner lütte Spraken in Europa is dat al lang begäng. Woso hebbt wi noch keen plattdüütschen Senner, un wat köönt wi doon, dat sik dat ännert? Un wat wünscht ji jo vun en plattdüütsch Medium? Wi freit uns op den Uttuusch un op jo Ideen un Vörslääg!
Bi de verleden Online-Warksteden hebbt sik de Deelnehmers wünscht, en Plattform to hebben, sik kennentolehren un to vernetten. Dat schall nu wiedergahn.
Junge Lüüd bet 40 Johr sünd hartlich inlaadt – tohören un uttuuschen!
- Wokeen dat maken deit: Bundesraat för Nedderdüütsch un Nedderdüütschsekretariat
- Anmellen un Nafragen: per Mail an: info@niederdeutschsekretariat.de
- Frist för’t Anmellen: Maandag, 15.08.2022
- Datum un Tiet: Dingsdag, 16.08.2022, Klock söss bet halvig acht an’n Avend
- Wo wi dat maakt: online, Zoom-Link kümmt över ‘n Mail
