Ünner dat Motto „Junge Lüüd und Platt“ finnt de 76. Bämsen-Dagfohrt vun’n 20. bet 22. September in’t Kurhuus in Bämsen statt. Inladen to de Dagfohrt över nedderdüütsche Spraak un Literatur deit de Vereen Bevensen-Tagung e. V.
To’n Optakt an’n Freedag gifft dat en „Stünn vun de jungen Schrieverslüüd“ – Gesche Gloystein, Arne Lentföhr un Nikos Saul warrt egen Texten lesen. Wat för Themen un Sichtwiesen bringt junge Schrieverslüüd in? Wokeen sünd jüm Lesers? Un wat wünscht se sik för de plattdüütsche Literaturszeen? Över düsse Fragen schall dat in’n Uttuusch na de Lesen gahn.
An’n Sünnavend staht dree verscheden Vördrääg op’n Plaan:
- Junge Lüüd un Sprakenpolitik
Thees Becker, Kevin Behrens un Nadine Koop as Vertreders för de jungen Lüüd in’n Bunnsraat för Nedderdüütch vertellt över jümehr spraakpolietsche Arbeit. - PLATTRADIO – en plattdüütsch Medienanbott
Jan Graf snackt doröver, woans Journalismus un Spraakutbo Hand in Hand gahn köönt. - Niederdeutsch zwischen den Meeren – Identität und Mehrwert
Johannes Callsen, Minnerheitenbeopdraagte vun’t Land Sleswig-Holsteen, stellt den ne’en Handlungsplaan Sprakenpolitik vör.
Dorto gifft dat so as jeedeen Johr dat Format „Op de Kist“, wo Liddmaten un Gäst egen Texten vörleest un dat „Literoorsche Kleeblatt“. Freien kann een sik op en Part to Kreativ Schrieven, Live-Theater mit Film vun de „Jungen Lüüd ut Löwenstedt“ un en Konzert mit „Swing op de Deel“. Un an’n Sünndag warrt de Lüttjeüttpries an „De lütten Sülfmeister“ ut Lümborg utgeven.
Dat hele Programm finnt een ünner https://www.bevensen-tagung.de/76-bevensen-tagung-2024/.
