Onlineveranstalten – Vördrag un Diskussion
Dünnersdag, 23.02.2023, Kl. 18.30 – 20.00
FUNKLOCK STOPPEN is nich allens! So en egen Senner, as wi em föddert, dat is man blots een lütte Stuuv mang anner in dat grote Huus, dat wi för de plattdüütsche Tokumst opstellen wüllt. Kloor, anner Stuven mööt ok plaant warrn t.B. för Platt in School un Familie, Platt bi Gericht un Amt, Platt in Recht un Gesett un noch veel mehr Saken.
Man woans buut een so en Huus? Woans plaant een de Tokumst vun en Spraak?
De anwennte Linguistik büdd Kategorien an, de Struktur bringt in uns Dinken över Spraak. Kategorien as Korpus (de Spraak an sik), Status (Bruuk un Ansehn vun de Spraak) oder Verwarf (dat Wiedergeven vun de Spraak) helpt uns bi´t Opteken vun dat, wat wi doon warrt un bi´t Bekieken vun dat, wat wi daan hebbt.
Op uns tokamen FUNKLOCK-Onlineveranstalten in´n Februarmaand warrt de Lübecker Autor un Spraakaktivist Arne Lentföhr uns in sien Impulsvördrag dorto wat vertellen. Achteran kiekt wi, woveel Winst FUNKLOCK STOPPEN un anner plattdüütsche Kampagnen un Vörhebben würklich hebbt för Korpus, Status un Verwarf vun´t Plattdüütsche. Vertellt doch mal vun Juun Proschekten! Dat Maal vun de Veranstalten? – Gemeensame Wöör finnen för den wichtigen Uttuusch op de Busteed vun dat plattdüütsche Huus. Hartlich willkamen!
Korpus, Status, Verwarf – Laat uns en Huus buen!
Onlineveranstalten. Vördrag un Diskussion.
Dünnersdag, 23. Februarmaand 2023, Kl. 18.30 – 20.00
Mitmaken kost nix.
Anmellen: j.graf@heimatbund.de
De Veranstalten „Korpus, Status, Verwarf“ finnt statt ünner dat Dack vun de Kampagne „Funklock stoppen“: Organisatschonen ut all acht plattrelevanten Bunnslänner föddert en öffentlich-rechtlich Medium, dat vun morgens bet avends Informatschoon, Ünnerholen un Service op plattdüütsch büdd. Op de Been stellt warrt de Veranstalten vun Bundesraat för Nedderdüütsch/Nedderdüütschsekretariat, Sleswig-Holsteenschen Heimatbund un Zentrum för Nedderdüütsch in Holsteen. Wi freut uns op Ju!
