"Platt mütt sichtbor warrn un sien Snackers:chen mööt sik sehn föhlen"
Ünner düt Motto hebbt de jungen Lüüd jümehr Wünsch un Födderns stellt, de se in de Neddersassen-Verkloren formuleert hebbt. De jungen Lüüd vertreedt de junge Sprekerschop vun’t Nedderdüütsche. Mit de Verkloren, de se in Tosamenarbeit mit den Bunnsraat för Nedderdüütsch un dat Nedderdüütschsekretariat opstellt hebbt, richt se sik sünnerlich an de polietsche Apentlichkeit. De jungen Lüüd hebbt de Neddersassen-Verkloren op den Beraden Utschuss an'n 17. Juni 2024 verkünnigt un överlangt.
2022 hebbt sik de jungen Lüüd al mit de Berliner Verkloren kloor verwöört un op jümehr Problemen as Meenschop vun junge Sprekers:chen opmarksam maakt un Missstänn op Bunnsebene thematiseert. In düsse Verkloren ut dat Johr 2024 hebbt se nu jümehr Berieven för dat Land Neddersassen formuleert. Dat geiht jüm ünner annern dorüm, dat Plattdüütsch ok in Neddersassen in de Verfaten opnahmen warrn schull, üm en Nateken vun de Charta, üm dat Fack „Nedderdüütsch“ mööglich to maken un üm de Ümsetten vun den Nedderdüütschünnerricht to moderniseren un verwiedern. Man ok nedderdüütsche Kultur- un Medienanbotten, en eenfachen Togang to de Spraak oder en transparentere nedderdüütsche Politik.
