Online-Warksteed: En Neddersassen-Verkloren

Düsse Warksteed is en Foortloper vun de Veranstalten, bi de wi mit junge Lüüd tosamen de Berliner Verkloren verfaat hebbt. Mit düsse Verkloren is en Junge Lüüd-Delegatschoon denn na Berlin föhrt un hett sik dor mit Bunnsdagsafornte ut den Parlamentskring Plattdüütsch tosamenseten un de Verkloren vörleggt. (Lees hier mehr över uns Exkurschoon) Wi hebbt uns för düt Johr vörnahmen, datsülvige Format foorttosetten un op de eersten Bunnslänner antowennen. Dat heet, wat in de Berliner Verkloren as en allmeen, lännerövergriepen Papeer formuleert is, schall nu ok op de enkelten Bunnslänner topasst warrn. Den Anfang maakt wi mit düsse Warksteed bi Neddersassen.

Dat Teel vun düsse Warksteed is also dat Kunziperen vun en "Neddersassen-Verkloren". De schall de wichtigsten Punkten ümfaten, wat sik junge Lüüd in Neddersassen vun de Politik verhaapt un wat ehr Anliggens un Sichten sünd. Wat düsse bunnslannsspeziefsche Verkloren so wichtig maakt, welke Themen, de uns ok för de Berliner Verkloren wichtig weren, warrt op Lännerebene beslaten. Dorso is dat heel wichtig, in de enkelten Bunnslänner to gahn, hier de nödigen Punkten uttomaken un vör de Lannspolitikers:chen de junge Lüüd-Perspektiev vörtodragen. Dormit dat passeren kann, wüllt wi mit jo tohoop in de Warksteed den Grundsteen leggen un düsse nödigen Punkten tosamendregen un daalbreken, wat hierbi dat Wichtigste is. Wi arbeidt dorför dütmal mit twee Lüüd tosamen: Heinrich Siefer is de Spreker vun'n Bunnsraat för Nedderdüütsch un Leider vun de Arbeidsgrupp för Nedderdüütsch un Literatur in de Ollnborger Landschop; un Gesche Gloystein is de Leidersche vun de Facksteed "Plattdüütsch" in de Emslänner Landschop. Beide sünd de Lannsvertreders:chen vun Neddersassen in'n Bunnsraat för Nedderdüütsch.

To de Warksteed sünd all Lüüd bet 40 Johr willkamen ut all Bunnslänner un Länner. Man sünnerlichen Fokus un Nadruck wüllt wi op de Lüüd ut Neddersassen leggen, dat se vörbi kaamt un sik un jemehr Perspektiev mit inbringt. Plattpolitik is vör allen Lokalpolitik. Leidt vundor düsse Inladen geern wieder an anner Neddersass'schen un Neddersassen!