De Bunnsraat för Nedderdüütsch (BfN) un dat Nedderdüütschsekretariat (NdS) binnt nu al siet en poor Johr junge Lüüd bi jümehr Arbeit in - dör sowat as de Jöögdbeopdraagten, Online-Warksteden oder Nettwarkdrapens. En Thema, dat sünnerlich hier man ok an vele anner Steden jümmers wedder opdükert, is dat Image un de Sichtborkeit vun Plattdüütsch. Üm beids steiht dat nich heel goot un dat gifft veel Potentschal för Verbetern. Ok mit de Warkkoppel Spraakplaan Nedderdüütsch 2050 stellt wi dat Rebeet düt Johr bavenan (to'n Wiederlesen).
Opkamen is de Wunsch na en Imagekampanje för Platt. So hett dat NdS Enn 2023 to en ThinkTank Platt na Hamborg inlaadt. Uns Maal bi de Veranstalten weer, dat wi tosamen Ideen för en Kampanje för Platt utarbeidt un dor sünd ok en Barg kreative Ideen vördag kamen. As Projekt, dat ümsett warrn schall, is an't Enn de Instagram-Kampanje PlattLandLüüd rutsuert.
PlattLandLüüd schall ...
- dorto bidregen, dat Image vun de Spraak to verbetern.
- Plattdüütsch in‘t apentliche Leven sichtbor maken.
- Weten över de Spraak vermiddeln.
- Minschen vörstellen, de wat mit de Spraak to doon hebbt.
Op den Instagram-Account PlattLandLüüd (https://www.instagram.com/plattlandlueued) geiht dat üm de Regionalspraak sülvst, man ok üm ehr Kultur, Geschicht un de Lüüd, de ehr snacken doot. Bavenan steiht en eernsthaftig Ansinnen, Weten över de Spraak to vermiddeln: Plattdüütsch hett en lange Geschicht, en Riekdom an Literatur, en Barg intressante Wöör un Seggwiesen, man ok vele noorddüütsche Spiesen un Drünk oder ok kulturelle Steden sünd eng mit de Spraak verknütt. En wichtige Rull för den BfN speelt de Politik för Platt, över de dat op den Account ok gahn schall. Man kloor, ok en kreativen Ümgang mit de Spraak höört dorto as de plattdüütsche Översetten för den Eurovision Songcontest düt Johr. Kiekt geern vörbi op den Kanal!
PlattLandLüüd is anleggt as Mitmaakkanal ...
De wichtigste Part vun de Kampagne sünd man de Minschen, de to de Sprekergrupp dortohöört. Un dor kaamt ji in't Speel! Snackt ji Platt un hebbt Lust, jo sülvst un joon Arbeit, wat Kulturells oder en Hobby vörtostellen? Denn schrievt uns geern an ünner moin@niederdeutschsekretariat.de. Mit kotte Videos vun plattdüütsche Füerwehrlüüd, Goorners:chen, Dokters:chen, Politikers:chen, Schoolmesters:chen, Elektrikers:chen ... wüllt wi wiesen, dat Plattdüütsch allerwegens tohuus is! Wi freit uns op joon Bidrääg!
