Bi den Spraakplaan Nedderdüütsch 2050 nehmt wi uns toeerst de Prestieschplanen vör. Wi wüllt Projekten in twee Modellregionen Stütt geven, bi de dat dorüm gahn schall, dat Prestiesch vun de Spraak as eernsthaftig un liekweertig to Hoochdüütsch to verbetern. Un de Spraak in't apentliche Leven to föddern. An düsse Steed sammelt wi Bispelen ut dat hele Spraakrebeet, bi de Plattdüütsch sichtbor maakt warrt un wat för dat Prestiesch vun de Spraak daan warrt. Wenn ji gode Bispelen hebbt, deelt uns dat geern mit, denn nehmt wi jüm mit op (info@niederdeutschsekretariat.de). Un wenn dat sogor een bi jo geven deit, de Platt snacken kann, denn kann een geern köstenfree en Schild "Wi snackt Plattdüütsch" bi uns bestellen. Leest hier mehr dorto: "Wi snackt Platt"-Schiller.
Ünnernehmens
- Plattdüütsche Produktnaams oder Informatschonen op Woren
- Husumer Mineralbrunnen: Waterbuddels mit plattdüütsche Betekens („Husumer frie/beden/veel“, „Waterkant“)
- Leev, Appelsaft ut dat Ole Land bi Hamborg mit en plattdüütschen Markennaam („Klingt platt, ist platt. Leev bedeutet „Liebe“ auf Plattdeutsch.“)
Gaststeden
- Spieskoorten, Toilettenschiller, Servietten …
Ladens un Geschäften (Supermarkten, Bäckers …)
- Beschrievens an de Regalen op Platt, plattdüütsche Schiller för de Woren
- Edeka Minden-Hannover hett en Reeg plattdüütsche Supermarkten mit plattdüütsche Schiller, de Kunnen warrt op Platt ansnackt un de Ünnernehmens arbeidt mit regionale Leveranten tohoop (Bispeel: EDEKA Center Weener)
- Broottüten bi’n Bäcker mit plattdüütsche Beschrievens „Rundstücken“
- Besünner Akschonen un Warv op Platt
Bookladens
- en Regal mit plattdüütsche Böker
- anner Afdelens mit plattdüütsche Betekens
Dokters un Aftheken
- Informatschoonsmaterialien op Platt
Stadtverwalten
- tweesprakige Schiller
- Henwiesschiller un Wegbeschrievens op Platt
Inrichtens vun de Stadt
- Stadtwarken, Affallweertschopshööv, Swömmbäder (Schwömmregeln op Platt)
Verkehrsbedrieven
- tweesprakige Ansagen in Bus un Bahn
- tweesprakige Schiller
Apentliche Gebüüd (Karken, Denkmalen, Museen etc.)
- Schiller un (Audio-)Guides op Platt
Stadtrundgang över de Schrieversche Thora Thyselius op Platt
In Broak (Brake) gifft dat en Stadtrundgang mit 8 Statschonen to de plattdüütsche Schrieversche Thora Thyselius mit QR-Koods, bi de een Spröken, Texten un Audios op hooch un platt kriggt.
Mehr över düt Projekt kann een hier finnen: 6.000 Schritte mit Thora Thyselius
Tourismusbedrieven
- Andenken op Platt, Koorten, Tassen, Opbacker, Kledaasch…, Warv mit de Spraak maken, Touren op Plattdüütsch anbeden
Kampanjen
„Rut mit de Spraak„, en Kampanje vun’t Plattdüütschzentrum för den Lannsdeel Sleswig för mehr Platt in’n Alldag un in de Apentlichkeit: „Rut mit de Spraak!“ Broottutenkampagne in de Landsdeel Sleswig
Un anners wat
„Plattdüütsch Sammeln“ is en Översicht över all de apentlichen Bruuks vun Plattdüütsch, of as Inschrift an en Gebüüd, as Spieskoort oder as Stratennaams. Bi düt Projekt kann jeedeen mitmaken un sülvst Biller hoochladen, de denn op de Landkoort wiest warrt. In’t Leven ropen hett de Akschoon dat Lännerzentrum för Nedderdüütsch, Stütt gifft de Beopdraagte för Kultur un Medien (BKM).
https://plattdeutsch-sammeln.de/
Foto vun’n Bidrag: Aavthoff Schuback in Jork-Hinterdeich ©Helga Peters
