Social Media Workshop mit Lisa

Du hest en egen (hooch- oder plattdüütschen) Kanal un weetst nich so recht, woans du en gröttere Reckwiet kriegen schasst? Du wullt geern Deel vun #plattdüütschefreedag warrn un bruukst mehr Kennis dorför? Woans kann een de Lüüd to mehr Interakschoon bringen? Oder wodännig optimeert een sien Kanal? Wenn du di dor sülvst bi rutkennen deist, denn büst du jüstemang an de richtige Adress.

Lisa Wrogemann, ok bekennt as @eat.platt.love, föhrt uns in de Welt vun de sotschalen Medien in, vör allen fokusseert wi uns op Instagram. Se wiest uns, wat en gode Story oder wat en goot Reel utmaken deit, woans een goden Content opstellt, mit den de Lüüd ok interageert, oder ok wat dat mit den Mythos Hashtags op sik hett.

Wi warrt ok glieks aktiv un maakt uns egen plattdüütschen Contents un laadt jüm op. För dat Design bruukt wi Canva, wat köstenfree is un lehrt hierför al de Basics. Dat is uns en wichtig Anliggen, dat wi Plattdüütsch ok online sichtborer maakt un sien Bruuk in de sotschalen Medien föddert.

Wat du mitbringen schusst:
Du hest en Smartphone un hest en egen Instagramaccount.
Du weetst al, wat en Story, Highlight, Reel un wat Hashtags sünd – wi fangt nich bi null an.
Opbest leggst du di al en köstenfre’en Account bi canva.com an.

De Warksteed is köstenfree, de Reiskösten warrt ok betahlt.
Dat köönt Lüüd ut elk Öller mitmaken, dat is nich alleen för junge Lüüd dacht!