Dat Nedderdüütschsekretariat nödigt to de eerste Warksteed vunjohr an’n Middeweken, 12. Februor 2025 to dat Thema Spraakutbo Plattdüütsch.
Siet verleden Johr hebbt sik so enige Saken daan un wi hebbt to’n Bispell de Arbeit för en Spraakplaan Nedderdüütsch 2050 opnahmen, en Warkkoppel is al bi un plaant en Prestieschplaan in twee Modellregionen. En anner Deel vun en Spraakplaan is de Spraakutbo – dat heet, dat de Spraak rieker warrn mütt, an Utdrucksmööglichkeiden, an Wöör, man ok an Vörgaven, wat denn to en goot Plattdüütsch tellen deit un wat nich. Dat weer ok Thema in uns Podcast klookluustert: Spraakutbo Nedderdüütsch – woans geiht een sowat an? Ok de Podcast schall dorto bidregen, dat Lüüd sik wedder mehr troot, ok anner Rebeden as man ehr Alldag mit Platt to füllen.
Bi de Arbeit an düt Thema is vun’n Bunnsraat för Nedderdüütsch en Broschüür rutkamen: “Mehr Wöör för Platt – Woans geiht Spraakutbo?“ Dorin warrt de Begreep un de Grünn för Spraakutbo verkloort, man ok wat för Strategien een bruken kann, üm ne’e Wöör to finnen, wat de fakensten Fehlers sünd, bi Lüüd, de Platt lehrt, un woans sik elk un een an den Spraakutbo bedeligen kann. De Broschüür kann een bi uns köstenfree bestellen oder online as PDF bekieken.
In düsse Warksteed wüllt wi uns över dat Thema uttuuschen: Wat fehlt jo för Wöör op Platt? Un wat för Wöör hebbt ji al nee in jo Platt opnahmen? As Instieg hebbt wi twee Referenten inlaadt: Jan Graf, ehdem Baas vun Plattradio, wat en wichtige Steed vun’n Spraakutbo weer. Un Robert Langhanke, Universität Flensborg, de Vörsitter vun de SASS-Redakschoon is, de dat SASS-Wöörbook rutgifft. He vertellt vun de spraakutboen Arbeit vun de Redakschoon.
De Warksteed is op Platt. Wi höögt uns, wenn ji mit dorbi sünd! Also eenfack anmellen:
Veranstalter:
Anmellen un Fragen:
Anmellensfrist:
Datum un Tiet:
Woneem:
Bunnsraat för Nedderdüütsch un Nedderdüütschsekretariat
per Mail an info@niederdeutschsekretariat.de
Dingsdag, 11.02.2025
Middeweken, 12.02.2025, Klock 6 bet halvig 8 an’n Avend
online, Zoom-Lenk kümmt as Mail
