Verleden Johr hebbt wi en egen Stammkring för junge Minschen op de Been stellt. Mit dat Format „Junge Lüüd ünner sik“ wüllt wi akraat düsse Lüüd anspreken un jem en Plattform beden, wo se sik mit Lieköllerige uttuuschen köönt. Dorto hebbt wi uns jümmers eenmal in’n Maand üm halvig söven per Zoom, also binnennetts, drapen un klönen för annerthalf bet twee Stünnen. Un ok düt Johr wüllt wi düsse Traditschoon bibeholen un junge Lüüd inladen dortotokamen.
„Jung“, dat heet bi uns so twüschen 18 un 40 Johr oolt. Wi kaamt bavento ut en Reeg verschillene Regionen, dat is de Vördeel vun so en Online-Stammkring. Dor sünd Lüüd ut Finnland, de USA un de Nedderlannen dorbi, as ok uut heel Plattdüütschland – de plattdüütsche/neddersassiske Spraak verbinnt even. Anners as bi de Warksteden, de wi elken Maand utricht, de sik jümmers üm en bestimmt Thema dreit un bi de dat inlaadte Referentschen bet Referenten gifft, sett wi uns bi de Terminen för en Stammkring op keen Thema fast. De Lüüd köönt eenfack so freeweg över jemehr Dag vertellen, wat dat so Nees gifft in de plattdüütsche Welt oder ok, wat se sik to’n Bispell wetenschoplich graad mit de Spraak utenanner sett un Hölp nödig hebbt. De Themen sünd avers ok afsluuts nich op Platt beschränkt, wi snackt ok wietaf över anner Saken – wat tellt, wi maakt dat allens op Platt.
Un ok för düt Johr steiht nu de eerste Termin al fast, wi wüllt an’n 14. Februar üm 18:30 (MET) in de Mööt kamen. Ok wenn du nee büst un noch nienich dorbi weerst oder Platt noch nich heel flödig snackst man tohören un dat öven wullt, wees nich bang un kumm eenfack vörbi över düssen Zoom-Lenk. Bi Fragen kannst du di ok jümmers an info@niederdeutschsekretariat.de wennen.
De ne’en Terminen in düt Johr as ok de Terminen för de Online-Warksteden vermellt wi jümmers över uns egen Newsletter för Junge Lüüd. Wenn du em ok abonneren wullt, schriev eenfack kott an de Mail-Adress baven un segg, du wullt em ok kriegen.
