An’n 20. un 21. Oktobermaand hett dat Nedderdüütschsekreteriaat tosamen mit de „jungen Lüüd“ en Videodreih utricht, bi den wi junge Lüüd interviewt hebbt. De Dreihoort weer de schöne nedderdüütsche Bibliothek vun de Carl-Toepfer-Stiften, de wi fründlicherwies dorför bruken dörven. Inlaadt as Interviewpartners:chen hebbt wi 9 junge Lüüd, de Platt köönt, man bi de de Achtergrund verschillen weer. Dormit hebbt wi en bunte Palett ut ünnerscheedliche Sichtwiesen afbillen kunnt. Un dat weer ok uns Teel: wiesen dat ok junge Platt snackt, of dat nu vun tohuus ut is of över de School, Uni oder in Egenregie. Elk vun düsse kotten Biografien warrt enkelt na un na in’t Internet verapentlicht.
Düt Videoprojekt is bannig wichtig, wieldat jüstemang in de hüdige Tiet jümmers noch dat Plattdüütsche mit öllere Lüüd in Verbinnen bröcht warrt. Dat warrt to faken noch as en Grootöllernspraak bekeken un dat dat bi junge Lüüd al meist utstorven is. Akraat dat Gegendeel wullen wi wiesen un hebbt ok en Barg Lüüd funnen, vun de wi nu 9 vörstellen wüllt. Se sünd fraagt worrn, wat ehr Achtergrund is un woans se an de Spraak kamen sünd, wo ehr Alldag dormit utsüht, wodännig dat tosamen passt, jung to ween un Platt to snacken, wat se sülvens för de Spraak doot un wat se dinkt, wat dat bruukt, üm ok in 50 Johr noch en levige Plattdüütschcommunity to hebben.
Dorbi weren vele vun de Interviewten gor nich so unbekennt. Welke vun jüm hebbt sik al en Naam in de sotschalen Medien maakt un kreeert faken nedderdüütsche Inhoolden, de goot ankaamt. Wi wullen de Stimm un Perspektiev vun junge Lüüd mang de Plattdüütschen luder maken un wiesmaken, dat Jungween un Plattsnacken ok jüstemang in de hüdige Tied allerbest tohooppassen deit. De Dreih sülvst weer ok en heel intressant un nee Beleevnis för vele vun jüm, de vördem ehr mit dat Handy Videos dreiht hebbt un nu vör en heel Kamerateam stunnen un sik befragen laten müssen. Dat motiveert jüm un hapentlich ok anner, indat dat wiest: „Sülvst“ mit Platt kümmt een vör de Kameras. Wi wören uns bannig freien, wenn de Videos en Stoot geevt, dat sik mehr junge Lüüd wiest un dat Bild vun en junge Spraakmeenschop ok na buten präsenteert.
Bet nu to hebbt wi al dree Videos verapentlicht, elke Week schöölt twee dorto kamen, de wi hierünner na för na verlenken warrt. Föddert worrn is dat Projekt mit Middel vun dat Bunnsministerium vun’t Binnere un för Heimat. För de Ümsetten un Produkschoon bedankt wi uns bi de Produkschoonsfirma 3eins. Un sünnerlich dankbor sünd wi ok för de Carl-Toepfer-Stiften, de uns de nedderdüütsche Bibliothek to Verfögen stellt hett.
