„Junge Lüüd för Plattdüütsch“ – ünner dat Motto harrn de Bundesraat för Nedderdüütsch un dat Nedderdüütschsekretariat junge Lüüd to en Online-Warksteed inlaadt. Deelnahmen hebbt 25 junge Lüüd ut dat nedderdüütsche Spraakrebeet. En poor vun jüm wahnt middewiel wiet weg – vun Süüddüütschland bet Finnland – un liekers sett se sik för jümehr Spraak in. Tohoopkamen sünd heel ünnerscheedliche Lüüd: De een is mit Platt groot worrn, de anner studeert Platt oder arbeidt in de Wetenschop un wedder een anner speelt plattdüütsch Theater. Wat jüm verbinnen deit, dat is de Regionaalspraak Plattdüütsch.
Bi't eerste Drapen stünnen Sprakenpolitik för Plattdüütsch un dat Kennenlehren vun de Mitspelers un de Strukturen op't Tapeet.
Al bi de Vörstellungsrunn hett de een oder anner een drapen, de in de Neegde vun em/ehr wahnt oder an de sülvige Uni studeert. Al dor is kloor worrn: Wi bruukt Nettwarken, üm anner (junge) Lüüd to finnen, de ok Platt snacken doot.
Wat is nödig, dat Platt ok in 50 Johr noch / wedder lebennig is? Wat bruukt wi dor för Strukturen för? To düsse Fragen hebbt sik de Deelnehmer:schen in veer Warkkoppels uttuuscht. Dat güng üm de Themen „Bildung“, „Medien“, „Kultur“ un „Dat sotschale Leven“. De jungen Lüüd weern sik enig: Jeedeen Bosteed is wichtig för de Tokunft vun Platt. Man dor mutt sik noch en Barg ännern, dat ok de jungen Lüüd inbunnen sünd. Ok de, de nich tohuus oder in de School Platt lehrt hebbt, mööt de Schangs hebben de Spraak to lehren. Dorto sünd Lehrböker un -materialien un ok mediale Anbotten för jüngere Minschen nödig. Veel mehr daan warrn schull ok bi’t Thema Digitaliseren. Wat för Rechten hebbt Kinner, junge Lüüd, öllere Lüüd de Spraak to lehren? Ok över düsse Fraag is bi’t Thema Bildung snackt worrn.
Mit dat, wat dat opstünns in de Medien op Platt geven deit, weern de mehrsten in de Runn nich tofreden. Se wünscht sik Berichten op Platt to all Themen ut’t öffentliche Leven - vun Politik bet Wetenschop un nich blots över plattdüütsche Themen. Velen wünscht sik ok en plattdüütschen Höörfunksenner, so as em de Kampagne „Funklock stoppen!“ vun’n BfN un den Sleswig-Holsteenschen Heimatbund föddert.
In de twete Week harrn de jungen Lüüd de Schangs mit twee Afornten ut den Düütschen Bunnsdag to snacken: Filiz Polat, Afornte ut Neddersassen för de Grönen un Gyde Jensen, Afornte ut Sleswig-Holsteen för de FDP. De jungen Lüüd wullen weten, wat de beiden as Politikerinnen bi’n Bund för Plattdüütsch utrichten un beschicken köönt, wat se to de Kampagne „Funklock stoppen“ seggen doot un wat se dorför doon köönt, dat de Spraak sichtborer is un beter wohrnahmen warrt. Eerste gode Ideen sünd al vördag kamen. „Wann snackt de Afornten in’n Bunnsdag mal wedder över de Regionaal- un Minnerheitenspraken in Düütschland?“ – Ok düsse Fraag vun de jungen Lüüd hebbt de Afornten mitnahmen. De beiden Snacks mit de Afornten hebbt de Deelnehmer:schen sünnerlich goot gefullen un ok de Uttuusch mit jüm - ok Filiz Polat un Gyde Jensen wullen dat een oder anner vun de jungen Lüüd weten.
Un to’n Afluss vun de Online-Warksteed güng dat üm de natschonalen Minnerheiten in Düütschland. Gösta Nissen, de dat Leid vun't Minnerheitensekretariat hett, hett de Situatschoon vun de Dänen, de Fresen, de Sorben un de Sinti un Roma in Düütschland vörstellt. Un Christoph Graf / Krystof Grofa, en junge Soorb, de ok jüst to’n Viezpräsident vun de JEV, Jugend Europäischer Volksgruppen wählt worrn is, hett ünner annern vun de Jugendarbeit bi de Sorben vertellt. Un de Plattdüütschen kunnen em Fragen stellen - dat güng vun Soorbsch in de Medien bet na de finanzielle Utstatten vun de Minnerheit.
De Trüchmellen na den Workshop weern bannig goot: Heel wichtig weer de Uttuusch mit anner junge Lüüd för de Deelnehmer:schen. Velen weer nich kloor, wo veel anner junge Minschen dat bi jüm in de Neegde gifft, de sik för de Spraak intresseert. De mehrsten hebbt seggt, dat se sik Strukturen wünscht, üm en regionaal, man ok en överregionaal Nettwark optoboen.
De Warksteed weer en eerste Opslag, tokamen Johr schall dat wiedergahn mit Junge Lüüd för Plattdüütsch. All de Ideen wüllt ja nu ok ümsett warrn!
De BfN un dat Nedderdüütschsekretariat seggt velen Dank an all de jungen Lüüd, de dorbi weern un gode Ideen inbröcht hebbt un ok an’t Bunnsbinnenministerium, dat Stütt geven hett för de Online-Warksteed.
